அதிர்ச்சி! செல்போன் வெளிச்சத்தில் இயக்கப்பட்ட அரசு பேருந்து: விருத்தாசலத்தில் பயணிகளின் உயிரோடு விளையாடும் அவலம்! (வீடியோ வைரல்)

  விருத்தாசலம் | டிசம்பர் 21, 2025

கடலூர் மாவட்டம் விருத்தாசலம் அருகே அரசு பேருந்து ஒன்றின் முகப்பு விளக்கு எரியாத நிலையில், செல்போன் டார்ச் லைட் வெளிச்சத்தில் பேருந்து இயக்கப்பட்ட சம்பவம் பெரும் அதிர்ச்சியை ஏற்படுத்தியுள்ளது.

சம்பவம் என்ன? விருத்தாசலம் அருகே உள்ள நல்லூரில் இருந்து திட்டக்குடி வரை தடம் எண் 8 கொண்ட அரசு பேருந்து இயக்கப்பட்டு வருகிறது. நேற்று (20.12.2025) இரவு இந்தப் பேருந்து சென்று கொண்டிருந்தபோது, திடீரென முகப்பு விளக்குகள் (Headlights) வேலை செய்யவில்லை. போதிய வெளிச்சம் இல்லாததால் ஓட்டுநர் பேருந்தை இயக்க முடியாமல் திணறியுள்ளார்.

செல்போன் வெளிச்சத்தில் பயணம்: மாற்று ஏற்பாடு ஏதும் செய்யப்படாத நிலையில், வேறு வழியின்றி ஓட்டுநர் மற்றும் நடத்துனர் தங்கள் செல்போன் டார்ச் லைட்டை எரியவிட்டு, அந்தச் சிறிய வெளிச்சத்தைக் கொண்டு இருட்டில் பேருந்தை இயக்கியுள்ளனர். இந்தப் பயங்கரமான பயணத்தை பேருந்தில் இருந்த பயணிகள் அச்சத்துடன் தங்களது செல்போனில் வீடியோ எடுத்து சமூக வலைதளங்களில் பதிவிட்டுள்ளனர். தற்போது இந்த வீடியோ வைரலாகி வருகிறது.

ஊழியர்கள் குமுறல்: இது குறித்து பேருந்து ஊழியர்களிடம் கேட்டபோது, "இந்தப் பேருந்து அடிக்கடி தொழில்நுட்பக் கோளாறுகளுக்கு உள்ளாகிறது. இது குறித்து அதிகாரிகளிடம் பலமுறை புகார் அளித்தும், அவர்கள் முறையாகச் சரி செய்வதில்லை. இதுபோன்ற இக்கட்டான சூழலில் நாங்கள் என்ன செய்வது?" என வேதனையுடன் தெரிவித்தனர்.

பயணிகள் அச்சம்: அரசு பேருந்தின் அவல நிலையால் பொதுமக்களின் உயிரோடு விளையாடும் அதிகாரிகளின் அலட்சியத்தை மக்கள் வன்மையாகக் கண்டித்துள்ளனர். விபத்து நேரிடும் முன் அரசு நடவடிக்கை எடுக்குமா? என சமூக ஆர்வலர்கள் கேள்வி எழுப்பியுள்ளனர்.

✍️ செய்தியாளர் : R. காமராஜ்

📞 தொடர்பு : 9080215691

🌿 மேஷம் முதல் மீனம் வரை |
2026-ம் ஆண்டு ராசி பலன்கள்

நற்பலன்களை பெற என்ன செய்யவேண்டும்..  பாக்கியம் பெருகும்! | தெய்வ அருள் உங்களை தழுவும்  | தவறாமல் படிக்கவும் ⚡

🛒 புதிய தகவல் இதோ 👇