🔱 காஞ்சிபுரத்தில் டிச.20, 21-ல் பிரம்மாண்ட ஆன்மீகத் திருவிழா: ஆதீனங்கள், மடாதிபதிகள் சங்கமம்!

 

காஞ்சிபுரம், டிசம்பர் 17:

ஆன்மீக நகரமான காஞ்சிபுரத்தில் வரும் டிசம்பர் 20 மற்றும் 21 ஆகிய தேதிகளில் 'திருமுறை திருவிழா' எனப்படும் பிரம்மாண்ட ஆன்மீகத் திருவிழா நடைபெற உள்ளது. இதில் பல்வேறு ஆதீனங்கள், மடாதிபதிகள் மற்றும் குருமார்கள் பங்கேற்று ஆசியுரை வழங்க உள்ளதாக விழா ஒருங்கிணைப்புக் குழுவின் செயலாளர் ஜி. முருகேஷ் புதன்கிழமை தெரிவித்தார்.

குபேரனின் அகந்தையை நொடியில் உடைத்த சிவன்!

சுவரஸ்யமான ஆன்மீக கதை

இது குறித்து அவர் செய்தியாளர்களிடம் கூறியதாவது:

காஞ்சிபுரம் காமராஜர் சாலையில் உள்ள சித்தீஸ்வரர் மகால் (பச்சையப்பாஸ் சில்க்ஸ் வளாகம்) மைதானத்தில் இந்த இரண்டு நாள் விழா நடைபெறுகிறது.

டிசம்பர் 20 (சனிக்கிழமை) - முதல் நாள் நிகழ்வுகள்:

• காலை: சிவ. தாமோதரன் சுவாமிகள் தலைமையில் 'திருவாசகம் முற்றோதல்' நிகழ்வு நடைபெறும்.

• மாலை: தருமை ஆதீனம் தலைமையில் நடைபெறும் நிகழ்வில், பல்வேறு ஆதீனங்கள், மடாதிபதிகள் மற்றும் குருமார்கள் மங்கல மேள வாத்தியங்களுடன் வரவேற்கப்பட்டு ஆசியுரை வழங்க உள்ளனர்.

• தொடர்ந்து, பன்னிரு திருமுறைகளை ஓதும் 'ஓதுவார்கள்' கௌரவிக்கப்படும் நிகழ்ச்சி நடைபெறும்.

டிசம்பர் 21 (ஞாயிற்றுக்கிழமை) - இரண்டாம் நாள் நிகழ்வுகள்:

• அதிகாலை: குமரகோட்டம் சுப்பிரமணிய சுவாமி கோயில் தலைமைப் பூஜகர் கே.ஆர். காமேசுவர சிவாச்சாரியார் தலைமையில், 108 சிவாச்சாரியார்கள் பங்கேற்கும் மகா சிவபூஜை நடைபெறுகிறது.

• திருக்கல்யாணம்: இதனைத் தொடர்ந்து, காஞ்சிபுரத்தின் நாயகன் ஸ்ரீ ஏகாம்பரநாதருக்கும், அன்னை ஏலவார்குழலிக்கும் திருக்கல்யாண உற்சவம் நடைபெறும். பிரபல பட்டிமன்றப் பேச்சாளர் முனைவர் கு. ஞானசம்பந்தன் திருக்கல்யாண தொகுப்புரை வழங்குகிறார்.

சிறப்பு அம்சங்கள்:

இந்தத் திருவிழாவில் காஞ்சி சங்கர மடத்தின் பீடாதிபதிகள், பல்வேறு மடங்களின் குருமார்கள் கலந்துகொள்கின்றனர். விழாவின் சிறப்பம்சமாக:

• பிரம்மாண்டமான சிவன் மற்றும் நந்தி உருவச் சிலைகள் நிறுவப்பட்டுள்ளன.

• இந்தியா முழுவதும் உள்ள புகழ்பெற்ற சிவாலயங்களின் புகைப்படக் கண்காட்சி பக்தர்களுக்காகக் காட்சிப்படுத்தப்பட்டுள்ளது.

விழாவிற்கு வரும் ஆயிரக்கணக்கான பக்தர்களுக்குத் தடையற்ற குடிநீர் வசதி, கழிப்பறை வசதி மற்றும் வாகன நிறுத்துமிட வசதிகள் செய்யப்பட்டுள்ளன. பேட்டியின் போது காஞ்சி திருமுறை திருவிழாக் குழு நிர்வாகிகள் உடனிருந்தனர்.