மொடக்குறிச்சி தொகுதி: 2026 போட்டிக்கான பரபரப்பு தொடக்கம்
 |
| மக்கள் ராஜன், டாக்டர் சரஸ்வதி, கே.வி.ராமலிங்கம் |
தாமரை மீண்டும் மலருமா? காங்கிரஸ்-திமுக இடையே பூசல் வெடிக்குமா?
ஈரோடு, ஜூலை 25-
மொடக்குறிச்சி, ஈரோடு மாவட்டத்தில் அமைந்துள்ள முக்கியமான சட்டமன்றத் தொகுதி. கடந்த காலங்களில் திமுக, அதிமுக கூட்டணி கட்சிகள் மாறி மாறி வெற்றி பெற்றுள்ளன. இத்தொகுதி, தமிழ் நாட்டில் மாற்றம், மதிப்பீடு, கூட்டணி சமநிலை ஆகியவற்றை பிரதிபலிக்கும் பிரதான தொகுதியாகக் கருதப்படுகிறது. 2026 சட்டமன்றத் தேர்தல் முன்னோட்டமாகவே மொடக்குறிச்சி தொகுதியில் முக்கியக் கட்சிகள் தங்களது தாக்கத்தை நிலைநாட்ட பல்வேறு நகர்வுகளை மேற்கொண்டு வருகின்றன.
பாஜக‘தாமரை மலர வைத்த மண்’
தமிழகத்தில் தாமரை மலரவே, மலராது என்று திமுக கூட்டணிக் கட்சிகள் முழங்கிக் கொண்டிருந்த சமயத்தில், பெரியார் பிறந்த ஈரோடு மாவட்டத்தின் மொடக்குறிச்சி தொகுதியில் 2021&ல் தாமரையை மலரவைத்து தனது செல்வாக்கைக் காட்டியது பாஜக. அப்போது இந்தத் தொகுதியில் போட்டியிட்ட திமுக துணைப் பொதுசெயலாளர் சுப்புலட்சுமி ஜெகதீசனை பாஜக புதுமுகமான டாக்டர் சரஸ்வதி தோற்கடித்து அனைவரையும் திரும்பிப் பார்க்க வைத்தார்.
2021 தேர்தலில் பாஜக தனது முதல்தடவையிலான வெற்றியை இத்தொகுதியில் பதிவு செய்ததோடு, தேசிய கட்சியாக தமிழகத்தில் தம்மை வலுவாக்கும் அடையாளச் சிறகாக இத்தொகுதியை பாவிக்கத் தொடங்கியது
2021ல் பாஜகவின் முதல் வெற்றி
2021 சட்டமன்றத் தேர்தலில்: சி. சரசுவதி (பாஜக)&78,125 வாக்குகள், சுப்புலட்சுமி ஜெகதீசன் (திமுக)&77,844 வாக்குகள் பெற்றனர். 281 வாக்குகள் வித்தியாசத்தில், பாஜக முதல் முறையாக இத்தொகுதியில் வெற்றி பெற்று, தங்களின் தமிழ்நாடு அரசியல் வரலாற்றில் முக்கிய பக்கத்தை எழுதியது.
கிருத்திகா சிவ்குமார் போட்டியிட வாய்ப்பு:
அதிமுக கூட்டணியில் இம்முறையும் தொகுதி தங்களுக்கே என தீர்க்கமாக இருக்கும் பாஜக, சிட்டிங் எம்எல்ஏ&வான சரஸ்வதிக்குப் பதிலாக அவரது மருமகள் கிருத்திகா ஷிவ்குமாரை நிறுத்தும் யோசனையில் இருப்பதாகச் சொல்கிறார்கள்
இந்தத் திட்டத்துடன் தனது ‘அறம் அறக்கட்டளை’ மூலமாக தொகுதிக்குள் மலிவு விலை உணவகம், மலிவு விலை மருத்துவம் போன்றவற்றை செயல்படுத்தி வருகிறார் கிருத்திகா. இதன் மூலம் மக்கள் இடையே தன்னம்பிக்கை உருவாக்க முயற்சிக்கிறார். தற்போது, பாஜக சார்பில் சிட்டிங் எம்எல்ஏ சரஸ்வதியின் மருமகள் கிருத்திகா சிவ்குமார் போட்டியிடும் வாய்ப்பு அதிகம் உள்ளதாக கூறப்படுகறிது.
காங்கிரஸ்-இழந்த இமையை திரும்பப் பெற முயற்சி
ஈவிகேஎஸ் இளங்கோவன் மறைவைத் தொடர்ந்து ஈரோடு கிழக்கு இடைத் தேர்தலில் தானே நேரடியாக போட்டியிட்டு அந்தத் தொகுதியை காங்கிரஸிடம் இருந்து கைப்பற்றியது திமுக. இனி ஈரோடு கிழக்கு தங்களுக்கு ஒதுக்கப்பட வாய்ப்பில்லை என்பதால், ஏற்கெனவே தாங்கள் வென்ற மொடக்குறிச்சி தொகுதிக்காக இப்போது ‘உரிமைக்குரல்’ எழுப்பத் தொடங்கி விட்டது காங்கிரஸ். இப்போது பாஜக&விடம் இருந்து இந்தத் தொகுதியைக் கைப்பற்ற காங்கிரஸ் ஆளுக்கு முந்தி களமிறங்கி இருக்கிறது.
அண்மையில் நடைபெற்ற ஈரோடு தெற்கு மாவட்ட காங்கிரஸ் நிர்வாகிகள் கூட்டத்தில், இதற்காக தீர்மானம் நிறைவேற்றி இருக்கிறார்கள். அடுத்தகட்டமாக தங்களின் விருப்பத்தை மாநிலத் தலைமைக்கும் மத்திய தலைமைக்கும் கொண்டு செல்லத் தயாராகி வருகிறார்கள்.
இதுகுறித்து பேசிய ஈரோடு தெற்கு மாவட்ட காங்கிரஸ் தலைவர் மக்கள் ராஜன்,
“ஈவிகேஎஸ் இளங்கோவன் மறைவுக்குப் பிறகு, முதல்வர் ஸ்டாலின் வேண்டுகோளை ஏற்று, தொகுதியை திமுக&வுக்கு விட்டுக் கொடுத்தோம். தற்போது, மீண்டும் ஈரோடு கிழக்கை நாங்கள் கேட்டுப் பெற முடியாத சூழலில், ஏற்கெனவே 2006&ல் காங்கிரஸ் வென்ற மொடக்குறிச்சி தொகுதியை எங்களுக்கு ஒதுக்க வேண்டும். இதை மனதில் வைத்து மொடக்குறிச்சி தொகுதியில் மொத்தம் 1450 கமிட்டிகளை அமைத்து கட்சியை பலப்படுத்தி உள்ளோம். இம்முறை மொடக்குறிச்சியை எப்படியாவது காங்கிரஸுக்கு கேட்டுப்பெற வேண்டும் என்பதில் கட்சி நிர்வாகிகள் உறுதியாக இருக்கிறார்கள்” என்றார்.
மொடக்குறிச்சி தொகுதியில் 6 நாட்கள் நடைபயணம் மேற்கொண்ட மக்கள் ராஜன், சமீபத்தில் செல்வபெருந்தகையை அழைத்து வந்து பொதுக்கூட்டமும் நடத்தியுள்ளார். ராஜன் மட்டுமல்லாது முன்னாள் எம்எல்ஏ&வான ஆர்.எம்.பழனிசாமியும் இந்தத் தொகுதியில் போட்டியிடும் திட்டத்தில் இருப்பதாகச் சொல்கிறார்கள்.
அதிமுகவில் வாய்ப்பு தேடும் வேட்பாளர்கள்
இது தங்களுக்கு சாதகமான தொகுதி என்பதால் அதிமுக தரப்பிலும் மாவட்டச் செயலாளர் கே.வி.ராமலிங்கம், முன்னாள் எம்பி&யான செல்வகுமார சின்னையன், முன்னாள் எம்எல்ஏ&வான சிவசுப்பிரமணியன் ஆகியோரும் அதிமுக தலைமையிடம் தொகுதிக்காக லாபி செய்ய ஆரம்பித்திருக்கிறார்கள்.
திமுக-நேரடி வாய்ப்பு கேள்விக்குறி
அதேபோல் திமுக மறுபடியும் இங்கு போட்டியிடலாம் என்ற நினைப்பில், நெசவாளர் அணியைச் சேர்ந்த எஸ்.எல்.டி.சச்சிதானந்தம், மொடக்குறிச்சி ஒன்றிய திமுக செயலாளர் குணசேகரன் ஆகியோரும் எம்எல்ஏ கனவில் இருக்கிறார்கள். இவர்களுக்கு நடுவில், நாமக்கல் மக்களவைத் தொகுதி வேட்பாளராக அறிவிக்கப்பட்டு, பிறகு வாபஸ் பெறப்பட்ட கொமதேக இளைஞரணி செயலாளர் சூரியமூர்த்தியும் மொடக்குறிச்சி கனவில் இருக்கிறார்.
இருப்பினும், காங்கிரஸ் இந்த தொகுதியை கேட்டு வற்புறுத்தும் சூழ்நிலையில், திமுக நேரடியாக இத்தொகுதியில் போட்டியிட வாய்ப்பு குறைவாகவே இருக்கலாம்.
கண்ணோட்டக் கமெண்டரி
மொடக்குறிச்சி தொகுதி தற்போது பாஜகவின் தனி அடையாள ஆட்சிப் பதக்கமாக இருக்க, அதை பிடித்து வைத்திருப்பது பாஜகவுக்கே முக்கிய இலக்கு. இ தே நேரத்தில், திமுக&காங்கிரஸ் கூட்டணியின் உள்ளூர் சமன்பாடுகள், இடைத்தேர்தல் வரலாறு, மற்றும் பங்கீட்டு அரசியல் ஆகியவற்றில் காங்கிரஸுக்கு இத்தொகுதி மீதான உரிமை நியாயமாகவே தெரிகிறது.
பாஜகவின் மறுசுழற்சி திட்டங்கள் மற்றும் கிருத்திகாவைப் போன்று புதிய முகங்களை கொண்டு வருவது, புதிய தலைமுறையை நோக்கி கட்சி நகர்கிறது என்பதற்கான புள்ளி.
மொடக்குறிச்சி, பார்ப்பதற்கு ஒரு தொகுதி மட்டுமே என்றாலும், தமிழகத்தில் கூட்டணித் தன்மை, தேசியக் கட்சி நிலைபாடு, மற்றும் சமூக சேவை அடிப்படையிலான அடையாள அரசியல் ஆகியவற்றின் ஒருங்கிணைந்த சோதனைக்களம் இது எனலாம்.
இத்தனை பேர் மொடக்குறிச்சிக்காக மோதினாலும் அதிமுக கூட்டணியில் பாஜக&வும் திமுக கூட்டணியில் காங்கிரஸும் இந்தத் தொகுதிக்காக செய்துவரும் களப்பணிகள் தான் அனைவரது கவனத்தையும் ஈர்த்துள்ளது.
வரலாற்றிலும், சமீபத்திய தேர்தல் முடிவுகளிலும் பல்வேறு திருப்பங்களைக் கண்ட இத்தொகுதி, 2026 தேர்தலில் யாருக்கு செந்தாமரையாக மலரும் என்பது தமிழ்நாட்டின் அரசியல் வரலாற்றில் குறிப்பிடத்தக்க தருணமாக அமையும்.
📜 மொடக்குறிச்சி தொகுதியின் வரலாற்று வெற்றி பட்டியல்:
| ஆண்டு | வெற்றியாளர் | கட்சி |
|---|---|---|
| 1967 | கே.ஆர். நல்லசிவம் | சங்கத சோசலிச கட்சி |
| 1971 | மு. சின்னசாமி | திமுக |
| 1977 | சுப்புலட்சுமி ஜெகதீசன் | அதிமுக |
| 1980 | ச. பாலகிருஷ்ணன் | அதிமுக |
| 1984 | ச. பாலகிருஷ்ணன் | அதிமுக |
| 1989 | அ. கணேசமூர்த்தி | திமுக |
| 1991 | கவிநிலவு தர்மராஜ் | அதிமுக |
| 1996 | சுப்புலட்சுமி ஜெகதீசன் | திமுக |
| 2001 | பி.சி. இராமசாமி | அதிமுக |
| 2006 | ஆர்.எம். பழனிசாமி | காங்கிரஸ் |
| 2011 | ஆர்.என். கிட்டுசாமி | அதிமுக |
| 2016 | வி.பி. சிவசுப்பிரமணி | அதிமுக |
| 2021 | சி. சரஸ்வதி | பாஜக |
இத்தொகுதி, கட்சிகள் மாறியும், சில நபர்களின் தனிப்பட்ட செல்வாக்கு தொடர்ந்து பிரதிபலிக்கப்படும் தன்மை கொண்டது. உதாரணமாக, சுப்புலட்சுமி ஜெகதீசன் மற்றும் ச. பாலகிருஷ்ணன் ஆகியோர் பலமுறை வெற்றி பெற்றுள்ளனர்.
No comments
Thank you for your comments