காஞ்சிபுரம் சலவை தொழிலாளி மகன் சிவில் நீதிபதியாக தேர்வு

காஞ்சிபுரம் :

காஞ்சிபுரம் சலவை தொழிலாளி மகன்  சிவில் நீதிபதியாக தேர்வு பெற்றுள்ளது மகிழ்ச்சி ஏற்படுத்தியுள்ளது. நேர்மையாக வழக்குகளை விரைந்து முடிக்கும் வகையில் செயல்பாடுகள் இருக்கும் என தேர்வான நீதிபதி பாலாஜி தெரிவித்துள்ளார்.

கோயில் நகரம் பட்டு நகரம் மற்றும் கல்வி நகரம் என பல புகழ் பெற்றது காஞ்சிபுரம்.  மேலும் காஞ்சிபுரத்தில் பட்டு நெசவில் உலக புகழ்பெற்ற வடிவமைப்பிற்காக விருதுகள் பெற்ற நிலையில் தற்போது காஞ்சிபுரம் சேக்குப்பேட்டை சாலியர்  தெற்கு தெருவில் வசிக்கும் சலவை தொழிலாளி மகன் சிவில் நீதிபதியாக தேர்வு பெற்றுள்ளது காஞ்சிபுரத்தில் பெரும் மகிழ்ச்சியை ஏற்படுத்தி உள்ளது.

சலவை தொழிலாளியான கணேசன் - மேகலா தம்பதியரின் இரண்டாவது மகனான பாலாஜி காஞ்சிபுரத்தில் தனது பள்ளிப்படிப்பை நிறைவு செய்த நிலையில், அதனை  தொடர்ந்து வழக்கறிஞராக வேண்டும் என எண்ணிய பாலாஜி சென்னை அம்பேத்கர் சட்டக் கல்லூரியில் சட்டம் பயின்றுள்ளார்.

சட்டப் படிப்பில் தேர்ச்சி பெற்ற நிலையில் காஞ்சிபுரம் நீதிமன்றத்தில் வழக்கறிஞர் சுகப்பிரியன் என்பவரிடம் ஜூனியர் ஆக பணிபுரிந்து வந்தார்.

குடும்ப நிலையை கருத்தில் கொண்டு அரசு சிவில் தேர்வினை எதிர்கொள்ளும் வகையில் தன்னை தயார் செய்து கொண்டு கடந்த ஆண்டு ஆகஸ்ட் மாதம் நடைபெற்ற முதன்மை தேர்வில் 12,500 பேர் தேர்வு எழுதி நிலையில் இவர் தேர்ச்சி பெற்று நவம்பர் மாதம் நடைபெற்ற இறுதி தேர்விலும் 472 நபர்களில் ஒன்றாக தேர்ச்சி பெற்றுள்ளார்.

அதனைத் தொடர்ந்து ஜனவரி 30 ஆம் தேதி நடைபெற்ற நேர்முகத் தேர்வில் சிறப்பாக செயல்பட்டு கடந்த 11ஆம் தேதி வெளியான முடிவுகளின் படி 237 நபர்களில் இவர் சிவில் நீதிபதியாக தேர்ச்சி பெற்றதாக அறிவிக்கப்பட்டுள்ளார்.

இதைத் தொடர்ந்து பெரும் மகிழ்ச்சி அடைந்துள்ள அவரது குடும்பம் மட்டும் உள்ளது காஞ்சிபுரம் நகரமும் மகிழ்ச்சி பொங்கி உள்ளது.

நீதிபதி தேர்வில் தேர்ச்சி பெற்றது குறித்து நம்மிடம் கூறுகையில், நாள்தோறும் 8 மணி நேரம் இத்தேர்விற்காக பயிற்சி மேற்கொண்ட நிலையில் வெற்றி பெற்றுள்ளதாகவும், தனது பனிக்காலத்தில் நேர்மையாகவும் வழக்குகளை விரைந்து முடிக்கும் நிலையை கையாளுவேன் என தெரிவித்தார்.