காசியை விட வீசம் அதிகமுடைய விருத்தாசலத்தில் கோலாகலம்: முருகப்பெருமான் வள்ளி, தெய்வானையுடன் தெப்பத்தில் பவனி!

விருத்தாசலம், மார்ச் 04: 

கடலூர் மாவட்டம் விருத்தாசலத்தில் புகழ்பெற்ற விருத்தகிரீஸ்வரர் திருக்கோயில் மாசி மகத் திருவிழாவின் 11-ஆம் நாள் நிகழ்வாக, முருகப்பெருமான் வள்ளி மற்றும் தெய்வானையுடன் தெப்பத்தில் எழுந்தருளி பக்தர்களுக்கு அருள்பாலித்தார்.

திருவிழா பின்னணி:

"காசியில் இறக்க முக்தி, விருத்தாசலத்தில் பிறக்க முக்தி" என்பார்கள். காசியை விட வீசம் (சிறிது) அதிக புண்ணியம் தரும் தலமாக விளங்கும் இக்கோயிலில், மாசி மகப் பெருவிழா கடந்த பிப்ரவரி 21-ஆம் தேதி கொடியேற்றத்துடன் தொடங்கியது. விழா நாட்களில் தினமும் சுவாமிக்குச் சிறப்பு அபிஷேகங்கள் மற்றும் வீதியுலாக்கள் நடைபெற்று வந்தன.

• பிப். 26 (6-ஆம் நாள்): விபசித்து முனிவருக்கு விருத்தகிரீஸ்வரர் காட்சி அளிக்கும் ஐதீகத் திருவிழா நடைபெற்றது.

• மார்ச் 01 (9-ஆம் நாள்): பிரம்மாண்டத் தேரோட்டம் நடைபெற்றது.

• மார்ச் 02 (10-ஆம் நாள்): மாசி மகத்தையொட்டி பல்லாயிரக்கணக்கான பொதுமக்கள் மணிமுத்தாற்றில் தங்கள் முன்னோர்களுக்குத் தர்ப்பணம் கொடுத்து வழிபட்டனர்.

தெப்பத் திருவிழா:

விழாவின் 11-ஆம் நாள் நிகழ்வான தெப்பத் திருவிழாவை முன்னிட்டு, முருகப்பெருமான், வள்ளி மற்றும் தெய்வானைக்குச் சிறப்பு அபிஷேக ஆராதனைகள் நடைபெற்றன. பின்னர், இரவு கோயிலிலிருந்து சுவாமி ஊர்வலமாகப் புறப்பட்டுப் பாலக்கரையில் உள்ள தெப்பக்குளத்திற்கு வந்தடைந்தார்.

இன்று அதிகாலை 3 மணி அளவில், வண்ண விளக்குகளால் அலங்கரிக்கப்பட்ட தெப்பத்தில் முருகப்பெருமான் வள்ளி, தெய்வானையுடன் எழுந்தருளினார். தெப்பம் குளத்தைச் சுற்றி வந்து பக்தர்களுக்குக் காட்சியளித்தது. இதில் விருத்தாசலம் மற்றும் அதன் சுற்றுவட்டாரப் பகுதிகளைச் சேர்ந்த ஏராளமான பக்தர்கள் கலந்து கொண்டு சுவாமி தரிசனம் செய்தனர்.

முக்கியப் பிரமுகர்கள் பங்கேற்பு:

இந்நிகழ்வில் விருத்தாசலம் நகரமன்றத் தலைவர் டாக்டர் சங்கவி முருகதாஸ், கோயில் நிர்வாகிகள் மற்றும் முக்கியப் பிரமுகர்கள் கலந்துகொண்டு சிறப்பித்தனர். விழாவிற்கான பாதுகாப்பு ஏற்பாடுகளை விருத்தாசலம் காவல்துறையினர் செய்திருந்தனர்.

---

செய்தியாளர்: R. காமராஜ், விருத்தாசலம்.