காஞ்சிபுரத்திற்குப் பெருமை: மாநில அளவிலான குத்துச்சண்டைப் போட்டியில் முதலிடம் - மாணவனுக்கு ஆட்சியர் பாராட்டு!

 காஞ்சிபுரம் | ஜனவரி 28, 2026

மாநில அளவிலான குத்துச்சண்டைப் போட்டியில் முதலிடம் பிடித்து தங்கம் வென்ற காஞ்சிபுரம் மாணவன் கமலேஷை, மாவட்ட ஆட்சியர் கலைச்செல்வி மோகன் நேரில் அழைத்து வாழ்த்துகளைத் தெரிவித்தார்.

சாதனைப் பயணம்:

காஞ்சிபுரம் மாவட்டம் குன்றத்தூர் அடுத்துள்ள அனகாபுத்தூரைச் சேர்ந்த முருகன் - ராஜேஸ்வரி தம்பதியரின் மகன் மு. கமலேஷ் (14). இவர் காஞ்சிபுரம் மாவட்டப் பள்ளிகள் சார்பில் குத்துச்சண்டைப் போட்டிகளில் பங்கேற்று வருகிறார்.

சமீபத்தில் தேனியில் பாரதியார் பிறந்தநாளை முன்னிட்டு மாநில அளவிலான குத்துச்சண்டைப் போட்டிகள் நடைபெற்றன. இதில் 14 வயதுக்கு உட்பட்டோருக்கான பிரிவில் பங்கேற்ற கமலேஷ், தனது சிறப்பான ஆட்டத்தை வெளிப்படுத்தி மாநில அளவில் முதலிடத்தைப் பிடித்து சாதனை படைத்தார்.

ஆட்சியரிடம் வாழ்த்து:

தங்கம் வென்ற மாணவன் கமலேஷ், இன்று தனது பெற்றோருடன் காஞ்சிபுரம் மாவட்ட ஆட்சியர் அலுவலகத்திற்கு வருகை தந்தார். மாவட்ட ஆட்சியர் கலைச்செல்வி மோகனைச் சந்தித்து, தான் வென்ற தங்கப் பதக்கம் மற்றும் சான்றிதழைக் காண்பித்து ஆசி பெற்றார்.

ஆட்சியரின் வாழ்த்துரை: மாணவனின் திறமையைப் பாராட்டிய ஆட்சியர், "காஞ்சிபுரம் மாவட்டத்திற்குப் பெருமை சேர்த்த கமலேஷ், எதிர்காலத்தில் தேசிய மற்றும் சர்வதேச அளவில் பல சாதனைகளைப் படைக்க வேண்டும்" என வாழ்த்தினார். மேலும், மாணவனின் விளையாட்டு மேம்பாட்டிற்குத் தேவையான ஒத்துழைப்புகள் குறித்தும் அதிகாரிகளுடன் ஆலோசித்தார்.