வேலைவாய்ப்பை உறுதி செய்ய புதிய முயற்சி: சிபெட் (CIPET) நிறுவனத்துடன் காஞ்சிபுரம் சங்கரா கல்லூரி புரிந்துணர்வு ஒப்பந்தம்!

 

காஞ்சிபுரம் | ஜனவரி 28, 2026

காஞ்சிபுரம் ஏனாத்தூரில் அமைந்துள்ள சங்கரா கலை மற்றும் அறிவியல் கல்லூரி, மத்திய அரசின் கீழ் இயங்கும் புகழ்பெற்ற சிபெட் (CIPET) நிறுவனத்துடன் இணைந்து மாணவர்களின் திறன் மேம்பாட்டிற்கான புரிந்துணர்வு ஒப்பந்தத்தை இன்று மேற்கொண்டுள்ளது.

ஒப்பந்தத்தின் பின்னணி:

மத்திய ரசாயனங்கள் மற்றும் உரங்கள் அமைச்சகத்தின் கீழ் தன்னாட்சி பெற்ற நிறுவனமாக இயங்கும் மத்திய பெட்ரோ கெமிக்கல் இன்ஜினியரிங் டெக்னாலஜி (CIPET), பிளாஸ்டிக் மற்றும் அது சார்ந்த தொழில்நுட்பங்களில் உலகத்தரம் வாய்ந்த பயிற்சிகளை வழங்கி வருகிறது. தற்போது சங்கரா கல்லூரியுடன் இணைந்துள்ளதன் மூலம், மாணவர்கள் கல்வி கற்கும் போதே தொழில்சார்ந்த நுணுக்கங்களைக் கற்க வழிவகை செய்யப்பட்டுள்ளது.

கையெழுத்திடும் நிகழ்வு:

சங்கரா கல்லூரியில் நடைபெற்ற இந்த நிகழ்வில், கல்லூரி முதல்வர் கலை.ராம.வெங்கடேசன் மற்றும் சிபெட் நிறுவனத்தின் திறன் மேம்பாட்டுப் பிரிவின் மூத்த திறன் வல்லுநர் சித்தாந்தன் ஆகியோர் புரிந்துணர்வு ஒப்பந்தத்தில் கையெழுத்திட்டு, ஆவணங்களைப் பரிமாறிக்கொண்டனர்.

மாணவர்களுக்குக் கிடைக்கும் பலன்கள்:

இந்த ஒப்பந்தத்தின் மூலம் மாணவர்கள் பெறவுள்ள முக்கியப் பயன்கள் குறித்து கல்லூரி முதல்வர் விளக்கினார்:

• மறுசுழற்சி தொழில்நுட்பம்: பிளாஸ்டிக் மறுசுழற்சி (Plastic Recycling) மற்றும் சுற்றுச்சூழல் பாதுகாப்புத் தொழில்நுட்பங்களில் நேரடிப் பயிற்சி.

• ஆராய்ச்சி மற்றும் மேம்பாடு: திறன் மேம்பாடு மற்றும் ஆராய்ச்சிப் பிரிவுகளில் புதிய கண்டுபிடிப்புகளை மேற்கொள்ள மாணவர்களுக்கு வாய்ப்பு.

• வேலைவாய்ப்பு: பிளாஸ்டிக் தொழில்நுட்பத் துறைகளில் உள்ள பல்லாயிரக்கணக்கான வேலைவாய்ப்புகளை எளிதில் பெற இந்தத் தொழில்முறை பயிற்சி உதவியாக இருக்கும்.

இந்நிகழ்வின் நிறைவாக, கல்லூரியின் வேலைவாய்ப்பு அலுவலர் விணு சக்கரவர்த்தி நன்றி தெரிவித்தார்.