காஞ்சிபுரத்தில் விவசாயிகள் நலன் காக்கும் நாள் கூட்டம் - ரூ.8.24 லட்சம் மதிப்பிலான நலத்திட்ட உதவிகள் வழங்கினார் ஆட்சியர்

காஞ்சிபுரம், ஆக.22:

காஞ்சிபுரம் மாவட்ட ஆட்சியர் அலுவலகத்தில் வெள்ளிக்கிழமை நடந்த விவசாயிகள் நலன் காக்கும் நாள் கூட்டத்தில் ரு.8.24 லட்சம் மதிப்பிலான நலத்திட்ட உதவிகளை ஆட்சியர் கலைச்செல்வி மோகன் வழங்கினார்.

காஞ்சிபுரம் மாவட்ட ஆட்சியர் அலுவலக மக்கள் நல்லுறவுக் கூட்ட அரங்கில் ஆட்சியர் கலைச்செல்வி மோகன் தலைமையில் விவசாயிகள் நலன் காக்கும் நாள் கூட்டம் நடைபெற்றது. மாவட்ட வருவாய் அலுவலர் செ.வெங்கடேஷ்,மாவட்ட ஊரக வளர்ச்சி முகமையின் திட்ட இயக்குநர் க.ஆர்த்தி ஆகியோர் முன்னிலை வகித்தனர். காஞ்சிபுரம் மாவட்ட வேளாண்மை இணை இயக்குநர் கிருஷ்ணவேணி வரவேற்று பேசினார்.

இக்கூட்டத்தில் வேளாண்மைத்துறை மூலம் 10 விவசாயிகளுக்கு ரூ.8.24லட்சம் மதிப்பிலான பயிர்க்கடன்கள் மற்றும் கால்நடை பராமரிப்புக் கடன்கள், 4 விவசாயிகளுக்கு ரூ.5172 மதிப்பிலான வேளாண் இடு பொருட்கள் உட்பட மொத்தம் ரூ.8.29லட்சம் மதிப்பிலான நலத்திட்ட உதவிகள ஆட்சியர் கலைச்செல்வி மோகன் வழங்கினார். 

முன்னதாக அரசின் பல்வேறு துறைகளைச் சேர்ந்த அதிகாரிகள் அரசால் செயல்படுத்தப்பட்டு வரும் வேளாண்மை தொடர்பான திட்டங்கள் குறித்து விரிவாக விளக்கிக் கூறினார்கள்.விவசாயிகளிடமிருந்து பெறப்பட்ட கோரிக்கை மனுக்களுக்கும் துறை சார்ந்த அலுவலர்கள் விளக்கம் அளித்தனர்.