48 ரயில்கள் நேரம் மாற்றம்

சென்னை, அக்.5-

தெற்கு ரயில்வேயில் புதிய காலஅட்டவணை 4-வது கட்டமாக வெளியிடப்பட்டுள்ளது. அதில் 48 ரயில்களின் நேரம் மாற்றி அமைக்கப்பட்டுள்ளது. புதிய கால அட்டவணைப்படி நேற்று முதல் ரயில்கள் இயக்கப்பட்டன. 

நேரம் மாற்றப்பட்ட முக்கிய ரயில்களின் விவரம் வருமாறு:

அவுரா-கன்னியாகுமரி விரைவு சிறப்பு ரயில் (02665) நாகர்கோவிலை காலை 9.25 மணிக்கு அடையும். இந்த ரயில் கன்னியாகுமரியை காலை 10.05 மணிக்கு சென்றடையும்.

மும்பை சி.எஸ்.எம்.பி.- நாகர்கோவில் சிறப்பு ரயில் (06351) வள்ளியூர் ரயில் நிலையத்துக்கு காலை 6.04 மணிக்கு வந்து சேரும். கன்னியாகுமரி- கே.எஸ்.ஆர். பெங்களூர் விரைவு ரயில் (06525) குழித்துறை ரயில் நிலையத்தை காலை 11.04 மணிக்கு அடையும்.

மறுமார்க்கமாக பெங்களூர் கே.எஸ்.ஆர்- கன்னியாகுமரி ரயில் (06526) குழித்துறை ரயில் நிலையத்தை மதியம் 1.44 மணிக்கும், இரணியல் ரயில் நிலையத்தை பிற்பகல் 2.14 மணிக்கும், நாகர்கோவில் சந்திப்பை பிற்பகல் 3.10 மணிக்கும் அடையும்.

பாவ்நகர்-திருநெல்வேலி சிறப்பு ரயில் (09572) நாகர்கோவில் டவுனை இரவு 7.38 மணிக்கு வந்தடையும். இந்த ரயில் வள்ளியூரை இரவு 8.19 மணிக்கு சென்றடையும். மதுரை-பிகானீர் அதிவிரைவு ரயில் (06053) சென்னை எழும்பூர் ரயில் நிலையத்தை இரவு 7.30 மணிக்கு வந்தடையும்.

மதுரை-சென்னை எழும்பூர் அதிவிரைவு சிறப்பு ரயில் (02638) தாம்பரம் ரயில் நிலையத்துக்கு அதிகாலை 4.08 மணிக்கு வந்து சேரும். சென்னை சென்ட்ரல்-திருப்பதி எக்ஸ்பிரஸ் ரயில் (06203) சென்ட்ரலில் இருந்து மாலை 4.30 மணிக்கு புறப்படும். இந்த ரயில் அரக்கோணம் சந்திப்பை மாலை 5.38 மணிக்கும், திருத்தணி ரயில் நிலையத்தை 5.58 மணிக்கும் அடையும்.

புதுச்சேரி-எழும்பூர் சிறப்பு ரயில் (06116) காலை 8.08 மணிக்கு வந்தடையும். இது தவிர நிஜாமுதீன்-கன்னியாகுமரி, நாகர்கோவில்-சாலிமார், திருநெல்வேலி- காந்தி தாம் உள்ளிட்ட ரயில்களின் நேரமும் மாற்றம் செய்யப்பட்டுள்ளது. இவற்றில் பெரும்பாலான ரயில்களின் நேரம் மாற்றம் நேற்று முதலும், சில ரயில்களின் நேரம் மாற்றம் 6, 7, 8ம் தேதி முதலும் அமல்படுத்தப்பட உள்ளது.