ஊரக உள்ளாட்சி தேர்தல்: அதிமுக இறுதி வேட்பாளர் பட்டியல் வெளியீடு

சென்னை: 

தமிழகத்தில் 9 மாவட்டங்களுக்கான ஊரக உள்ளாட்சி தேர்தலுக்கான முதல்கட்ட வேட்பாளர் பட்டியலை வெளியிட்ட அதிமுக, இன்று (21/09/2021) இறுதி வேட்பாளர் பட்டியலையும் வெளியிட்டது.

தமிழகத்தில் புதிதாக உருவாக்கப்பட்ட 9 மாவட்டங்களுக்கான ஊரக உள்ளாட்சி தேர்தல் வரும் அக்டோபர் 6 ஆம் தேதி மற்றும் அக்டோபர் 9ஆம் தேதிகளில் இரண்டு கட்டங்களாக நடைபெறுகிறது.  இதற்கான வேட்புமனு தாக்கல் செப்.,15ல் துவங்கி நாளை (22/09/2021)  முடிவடைகிறது. 

இத்தேர்தலில் பா.ம.க., நாம் தமிழர் கட்சி, மக்கள் நீதி மய்யம் உள்ளிட்ட கட்சிகள் தனித்து போட்டியிடுவதாக ஏற்கனவே அறிவித்துவிட்டன. இடம் பங்கீடு தொடர்பாக, அ.தி.மு.க., - பா.ஜ., இடையே தொடர்ந்து பேச்சு நடந்தது. அதன் தொடர்ச்சியாக, அ.தி.மு.க., சார்பில் முதல் கட்ட வேட்பாளர் பட்டியல் நேற்று வெளியிடப்பட்டது.

அதில், காஞ்சிபுரம், செங்கல்பட்டு, ராணிப்பேட்டை, விழுப்புரம், தென்காசி மாவட்டங்களில், மாவட்ட ஊராட்சி வார்டுகளுக்கான வேட்பாளர்களை, அறிவித்தது. 

இந்நிலையில், இன்று அதிமுக சார்பில் இறுதி வேட்பாளர் பட்டியலும் வெளியிடப்பட்டுள்ளது.

ஊரக உள்ளாட்சி தேர்தலில் 7 முனை போட்டி

ஊரக உள்ளாட்சி தேர்தலில் திமுக கூட்டணி ஒரு அணியாகவும், அதிமுக கூட்டணி இன்னொரு அணியாகவும் களம் காண்கின்றன.

திமுக கூட்டணி

திமுக கூட்டணியில் காங்கிரஸ், மதிமுக, விடுதலை சிறுத்தைகள், இந்திய கம்யூனிஸ்டு, மார்க்சிஸ்டு கம்யூனிஸ்டு, இந்திய தேசிய லீக், மனிதநேய மக்கள் கட்சி, தமிழக வாழ்வுரிமை கட்சி, கொங்குநாடு தேசிய மக்கள் கட்சி உள்ளிட்ட கட்சிகள் இடம் பெற்றுள்ளன.

அதிமுக கூட்டணி

அதிமுக கூட்டணியில் பா.ஜனதா, தமாகா ஆகிய கட்சிகள் இடம் பெற்றுள்ளன. 

பாமக தனித்து போட்டி

அதிமுக கூட்டணியில் இருந்த பாமக அந்த கூட்டணியில் இருந்து விலகி தனித்து போட்டியிடுகிறது.

தேமுதிக - மநீம--நாதக-அமமுக ஆகியவை தனித்து போட்டி

விஜயகாந்தின் தேமுதிக, கமல்ஹாசனின் மக்கள் நீதி மய்யம், சீமானின் நாம் தமிழர் கட்சி, டி.டி.வி.தினகரனின் அம்மா மக்கள் முன்னேற்ற கழகம் ஆகிய கட்சிகளும் தனித்தே களம் காண்கின்றன.

இதன் மூலம் ஊரக உள்ளாட்சி தேர்தலில் 7 முனை போட்டி ஏற்பட்டு உள்ளது.

தி.மு.க., அ.தி.மு.க. கூட்டணியில் ஊரக உள்ளாட்சி பதவிகளில் போட்டியிடுவதற்கு சுமூக உடன்பாடு ஏற்பட்டுள்ளது. இதையடுத்து தி.மு.க., அ.தி.மு.க. ஆகிய கட்சிகள் சார்பில் போட்டியிடும் வேட்பாளர்களின் பட்டியலும் வெளியாகி உள்ளன. அந்தந்த மாவட்டங்களை சேர்ந்த நிர்வாகிகள் அமர்ந்து பேசி யார்-யாருக்கு எந்த இடங்கள் என்பது பற்றி முடிவெடுத்து உள்ளனர்.  

இதன்படி தி.மு.க. கூட்டணியில் இடம்பெற்றுள்ள காங்கிரஸ் உள்ளிட்ட கட்சிகள் தங்களுக்கு ஒதுக்கப்பட்டுள்ள இடங்களில் போட்டியிடுகின்றன.

இதே போல் அ.தி.மு.க. கூட்டணியில் உள்ள பா.ஜனதாவும் தங்களுக்கு வெற்றி வாய்ப்புள்ள இடங்களை கேட்டு பெற்று களம் இறங்குகிறது. த.மா.கா.க்கு குறிப்பிட்ட சில இடங்கள் ஒதுக்கப்படுகின்றன.

இந்த இரண்டு கூட்டணிகளுக்கு போட்டியாக பாமக, தேமுதிக, மக்கள் நீதி மய்யம், நாம் தமிழர் கட்சி, அம்மா மக்கள் முன்னேற்ற கழகம் ஆகிய கட்சிகளின் வேட்பாளர்களும் களத்தில் இறங்கியுள்ளனர்.

ஊரக உள்ளாட்சி பதவிகளில் தங்களை வெற்றி பெற வைக்குமாறு அனைத்துக் கட்சி வேட்பாளர்களும் தீவிர பிரசாரத்தில் ஈடுபட்டு வருகிறார்கள்.

இதன் மூலம் கிராமப்புறங்களில் பஞ்சாயத்து தலைவர், வார்டு உறுப்பினர்கள், ஊராட்சி ஒன்றிய உறுப்பினர், மாவட்ட ஊராட்சி ஒன்றிய உறுப்பினர் ஆகிய பதவிகளை பிடிக்க அனைத்து கட்சி வேட்பாளர்கள் மத்தியிலும் கடும் போட்டி நிலவுகிறது...

கிராமப்புறங்களை பொறுத்தவரை அந்தந்த பகுதிகளில் செல்வாக்கு பெற்றவர்களே வார்டு உறுப்பினர்களாக வெற்றி பெறுவதற்கு வாய்ப்புள்ளது என்பதால் திமுக மற்றும் அதிமுக கூட்டணி வேட்பாளர்களுடன் மற்ற கட்சியை சேர்ந்த வேட்பாளர்களும் தங்களது சொந்த செல்வாக்கை காட்டும் முயற்சியில் முனைப்புடன் செயல்பட்டு வருகிறார்கள்.

உள்ளாட்சி தேர்தலில் பதிவாகும் வாக்குகள் அடுத்த மாதம் 12ம் தேதி எண்ணப்படுகிறது.  அன்றே முடிவுகளும் வெளியாக உள்ளன.

தேர்தலுக்கு இன்னும் இரண்டு வாரங்களே இருப்பதால் கிராமப்புறப் பகுதிகளில் ஊரக உள்ளாட்சி தேர்தல் களம் களை கட்டி காணப்படுகிறது.