வரதராஜபெருமாள் கோயிலுக்குச் சொந்தமான 271 ஏக்கர் நிலம் மாயம்...!

காஞ்சிபுரம்:

காஞ்சிபுரம் அருள்மிகு வரதராஜபெருமாள் கோயிலுக்குச் சொந்தமான பல கோடி ரூபாய் மதிப்புள்ள சுமார் 271 ஏக்கர் நிலம் மாயம் என்று தகவல் அறியும் உரிமைச் சட்டத்தின் கீழ் அம்பலமாகியுள்ளது.

காஞ்சிபுரம் அருள்மிகு வரதராஜபெருமாள் கோயிலில் கோயிலுக்குச் சொந்தமான பல கோடி ரூபாய் மதிப்புள்ள நிலம் உள்ளது. 

இது குறித்து விவரம் அடங்கிய பதாகையை கோயில் நிர்வாகம் பக்தர்கள் தெரிந்து கொள்ளும் வகையில் வைக்க வேண்டும் என்பதுதான் சென்னை உயர்நீதிமன்றத்தின் உத்தரவு. 

இதன்படி காஞ்சிபுரத்தில் பல கோயில்களில் பக்தர்கள் அறிந்து கொள்ளும் வகையில் எவ்வளவு வாடகை பாக்கி நிலுவையில் உள்ளது மற்றும் சொத்து விவரம் அடங்கிய பதாகைகள் வைக்கப்பட்டது.

ஆனால் அருள்மிகு வரதராஜபெருமாள் கோயிலில் மட்டும் இதுபோல் சொத்து விவரம் அடங்கிய பதாகைகள் வைக்கப்படவில்லை. 

இது தொடர்பாக கடந்த 2019 ஆம் ஆண்டு டில்லிபாபு என்பவர் தகவல் அறியும் உரிமைச் சட்டத்தின் கீழ் அனுப்பிய விண்ணப்பத்தின் படி 448.43 ஏக்கர் நிலம் உள்ளது என நிர்வாகம் பதில் தந்துள்ளது. 

இதைத்தொடர்ந்து அடுத்த 2 ஆண்டுகள் கழித்து 16.-08-.2021 தேதி சு.அண்ணாமலை என்பவர் தகவல் அறியும் உரிமைச் சட்டத்தின் கீழ் அனுப்பிய விண்ணப்பத்தின் படி 177.20 ஏக்கர் நிலம் மட்டுமேதான் உள்ளது என கோயில் நிர்வாகம் பதில் கொடுத்துள்ளது.

இதில் அதிர்ச்சிகரமான தகவல் என்னவென்றால் சுமார் 271 ஏக்கர் நிலம் மாயமாகி உள்ளது என்பது தகவல் அறியும் உரிமைச் சட்டத்தின் கீழ் தற்போது தெள்ளத் தெளிவாக தெரியவந்துள்ளது. 

இதுகுறித்து அரசு உரிய விசாரணை நடத்தி நிலத்தை மீண்டும் மீட்க வேண்டும் என்ற கோரிக்கை பொதுமக்கள் இடையே வலுப்பெற்றுள்ளது.

RTI தகவல்கள்:

கேள்வி எண்  = 13 /  தேதி : 31-05-2019

கேள்வி எண்  = 13 ன் பதில் /  தேதி : 14-06-2019

கேள்வி எண்  = 12 /  தேதி : 16-08-2021

கேள்வி எண்  = 12 ன் பதில் /  தேதி : 08-09-2021