காஞ்சிபுரத்தில் ரவுடிகள் ஆபரேஷன்... சிக்கிய 110 ரவுடிகள்... எஸ்பி சுதாகர் எச்சரிக்கை

சென்னை, ஆக. 17–

காஞ்சிபுரம் மாவட்டத்தில் பிரபல ரவுடி படப்பை குணாவை போலீசார் கைது செய்து சிறையில் அடைத்துள்ளனர். இதுவரை நடந்த ரவுடிகள் ஆபரேஷனில் மொத்தம் 110 ரவுடிகள் சிக்கியுள்ளனர்.

காஞ்சிபுரம் மாவட்டத்தில் ரவுடிகளை ஒடுக்க தனிப்படைகள் அமைக்கப்பட்டுள்ளதாகவும், மாமூல் கேட்டு வியாபாரிகளையும், பொதுமக்களையும் துன்புறுத்துவது, நில அபகரிப்பு போன்ற விவகாரங்களில் ஈடுபடும் நபர்கள் மீது கடும் நடவடிக்கை மேற்கொள்ளப்படும் என எஸ்பி டாக்டர் சுதாகர் எச்சரித்துள்ளார்.

ரவுடிகளுக்கு பெயர் போனது காஞ்சிபுரம்.  நில அபகரிப்பு கூலிப்படை, கட்டப்பஞ்சாயத்து, போதைப்பொருள் விற்பனை என்று ரவுடிகள் அங்கு கோலோச்சி வருகின்றனர். 

தமிழக சட்டம் ஒழுங்கு டிஜிபியாக சைலேந்திரபாபு பொறுப்பேற்றதும் கட்டப் பஞ்சாயத்து, கூலிப்படை ரவுடிகள் மீது கடும் நடவடிக்கைகள் மேற்கொள்ளும்படி உத்தரவிட்டார். அ

தனைத் தொடர்ந்து காஞ்சிபுரம் டிஐஜி சத்யப்பிரியா மேற்பார்வையில், எஸ்பி டாக்டர் சுதாகர் ரவுடிகள் விஷயத்தில் கடும் நடவடிக்கைகளை மேற்கொண்டு வருகிறார். 

காஞ்சிபுரம் மாவட்டத்தில் உள்ள ஹிஸ்டரி ஷீட் ரவுடிகளை பட்டியலிட்டு அவர்கள் கண்காணிக்கப்பட்டு வருகின்றனர்.

காஞ்சிபுரம் மாவட்டம், சுங்குவார் சத்திரம் காவல் நிலைய எல்லைக்குட்பட்ட கீரநல்லூர் கிராமத்தைச் சேர்ந்தவர் பிரபாவதி (பெயர் மாற்றம் செய்யப்பட்டுள்ளது). அவரது தாய், தந்தையருக்கு சொந்தமான நிலத்தின் சந்தை மதிப்பு விவரத்தினை பார்ப்பதற்காக பட்டா விண்ணப்பித்து வாங்கியுள்ளார். சுங்குவார் சத்திர காவல் நிலைய பிரபல சரித்திர பதிவேடு ரவுடி மதுரமங்கலத்தைச் சேர்ந்த குணா என்ற படப்பை குணா என்பவரிடம் பிரபாவதியின் தந்தை சுமார் ஒன்றரை ஆண்டுகளுக்கு முன்பு ரூ.2 லட்சம் கடன் பெற்றுள்ளார். இதனால் குணா தற்போது அந்த நிலத்தின் ஆவணத்தை கேட்டு மிரட்டி வந்துள்ளார்.

இந்நிலையில் பிரபாவதி நிலத்தின் பட்டாவை பெற்றுச் சென்றதால் குணா தனது அடியாட்களை விட்டு பிரபாவதியை மிரட்டியுள்ளார். இது தொடர்பாக பிரபாவதி சுங்குவார் சத்திரம் காவல் நிலையத்தில் புகார் அளித்ததின் பேரில் ரவுடி குணா (எ) படப்பை குணா மற்றும் அவரது கூட்டாளிகள் மீது போலீசார் வழக்கு பதிவு செய்தனர். அதனையடுத்து குணா தலைமறைவாகி விட்டார். 

அவரை தேடி வந்த நிலையில் சுங்குவார்சத்திரம் போலீசார் நேற்று கைது செய்தனர். குணா மீது காஞ்சிபுரம் மற்றும் செங்கல்பட்டு மாவட்டங்களில் பல்வேறு காவல் நிலையங்களில் கொலை, கொலை முயற்சி மற்றும் அடிதடி உள்பட மொத்தம் 24 வழக்குகள் உள்ளது. மேலும் படப்பை குணா தான் திருந்தி வாழ விரும்புவதாக கடந்த ஆண்டு காவல்துறையில் மனு அளித்துள்ள நிலையில் மீண்டும் குற்றச்சம்பவத்தில் ஈடுபட்டது குறிப்பிடத்தக்கது. 

கடந்த ஓராண்டில் இதுவரை 110 ரவுடிகள் கைது செய்யப்பட்டுள்ளதாகவும் அவர்களில் 35 பேர் மீது குண்டர் சட்டம் பாய்ந்துள்ளதாகவும் காஞ்சிபுரம் எஸ்பி சுதாகர் சார்பில் தெரிவிக்கப்பட்டுள்ளது.

காஞ்சிபுரம் எஸ்பி டாக்டர் சுதாகர் கூறுகையில்,

‘‘காஞ்சிபுரம் மாவட்டத்தில் மூன்று கொலை வழக்குகள் உட்பட 17 வழக்குகளில் சம்மந்தப்பட்ட பிரபல சரித்திர பதிவேடு ரவுடிகள் தணிகா (எ) தணிகைவேல், வசா (எ) வசந்த் ஆகியோர் குண்டர் தடுப்புச் சட்டத்தின் கீழ் கைது செய்யப்பட்டு சிறையில் அடைக்கப்பட்டனர். அதேபோல் 7 கொலை வழக்கு உள்பட 21 வழக்குகளில் தொடர்புடைய சோமங்கலம் ரவுடி மேத்யூ மீதும் குண்டர் சட்டம் பாய்ந்தது. அதனைத் தொடர்ந்து காஞ்சிபுரம் மாவட்டத்தில் உள்ள 14 காவல் நிலையங்களில் கண்காணிக்கப்பட்டு வரும் சரித்திர பதிவேடு குற்றவாளிகள் மீது தொடர்ச்சியாக நடவடிக்கைகள் மேற்கொள்ளப்பட்டன. அதன்படி காஞ்சி தாலுக்கா காவல் நிலைய பிரபல ரவுடி ராஜா (எ) வசூல் ராஜா, அருண் (எ) ஏம்பா அருண் உட்பட இந்த ஆண்டில் மட்டும் 109 சரித்திர பதிவேடு ரவுடிகள் பல்வேறு வழக்குகளில் கைது செய்யப்பட்டு சிறையில் அடைக்கப்பட்டுள்ளனர். இவர்களில் 35 ரவுடிகள் மீது குண்டர் சட்டம் பாய்ந்துள்ளது.

மேலும், 14 காவல் நிலையங்களில் உள்ள 246 சரித்திர பதிவேடு ரவுடிகளை எவ்வித குற்றச் செயல்களில் ஈடுபடாமலிருக்க வருவாய் கோட்டாட்சியர் முன்பு ஆஜர்படுத்தி அவர்களிடமிருந்து ஓராண்டிற்கு நன்னடத்தை பிணை பெறப்பட்டுள்ளது. நன்னடத்தையில் பெறப்பட்ட ரவுடிகள் மீண்டும் நன்னடத்தை பிணையை மீறி ஏதேனும் குற்ற செயல்களில் ஈடுபட்டால் நன்னடத்தை பிணையை மீறிய குற்றத்திற்காக ஓராண்டு சிறைவாசம் அனுபவிக்க நேரிடும் எச்சரிக்கப்பட்டுள்ளனர். பொதுமக்கள், வணிக வியாபாரிகள் மற்றும் தொழில் முனைவோருக்கு இடையூறு மற்றும் அச்சுறுத்தல் ஏற்படுத்தும் நபர்கள் மீது கடும் நடவடிக்கை மேற்கொள்ளப்படும். மேலும் ரவுடிகள் மீது மேற்கொள்ளப்படும் நடவடிக்கையின் காரணமாக தலைமறைவாக இருந்து வரும் மற்ற ரவுடிகளையும் பிடிக்க இரண்டு இன்ஸ்பெக்டர்கள் தலைமையில் தனிப்படை அமைக்கப்பட்டுள்ளது என காஞ்சிபுரம் எஸ்பி சுதாகர் தெரிவித்துள்ளார்.