முதலமைச்சர் மாநில விளையாட்டு விருது பரிசு - விண்ணப்பிக்க அழைப்பு...

வேலூர்:

பன்னாட்டு அளவிலும், தேசிய அளவிலும் பதக்கங்கள் பெற்று சிறந்து விளங்கும் 2 ஆண் மற்றும் 2 பெண் விளையாட்டு வீரர்கள், 2 சிறந்த பயிற்றுநர்கள், 2 சிறந்த உடற்கல்வி இயக்குநர்/உடற்கல்வி ஆசிரியர்களுக்கு, முதலமைச்சர் மாநில விளையாட்டு விருது பரிசாக தலா ரூ.1.00 இலட்சம் வீதம், ரூ.10,000/- மதிப்பிலான தங்கப்பதக்கம் மற்றும் பாராட்டுப் பத்திரம் ஆகியவற்றை ஒவ்வொரு நிதியாண்டிலும் (ஏப்ரல் 1 முதல் மார்ச் 31 முடிய) இளைஞர் நலன் மற்றும் விளையாட்டு மேம்பாட்டுத் துறை மூலம் வழங்கப்பட உள்ளது. 

விளையாட்டுப் போட்டிகளை நடத்தும் ஒரு நடத்துநர்/ஒரு நிர்வாகி/ஓர் ஆதரவளிக்கும் நிறுவனம் மற்றும் ஒரு நன்கொடையாளர் (ரூ.10.00 இலட்சத்திற்கும் அதிகமாக நன்கொடை அளித்தவர்)/ஓர் ஆட்ட நடுவர்/நடுவர்/நீதிபதி ஆகியோர்களுக்கும் ஒவ்வொரு நிதியாண்டிலும் (ஏப்ரல் 1 முதல் மார்ச் 31 முடிய) முதலமைச்சர் மாநில விளையாட்டு விருது வழங்கப்படும்.  

இவர்களுக்கு 2020-21ஆம் ஆண்டுக்கான மேற்கண்ட விருதிற்கு ரூ.10,000/- க்கு மிகாமல் ஒரு தங்கப்பதக்கமும் ஒரு பாராட்டுச் சான்றிதழும் வழங்கப்படுகிறது.   இவர்களுக்கு விருது வழங்குவதற்கு முந்தைய மூன்று ஆண்டு செயல்பாடுகள் கணக்கில் எடுத்துக் கொள்ளப்படும்.  

நிபந்தனைகள் :-

1) தமிழ்நாட்டில் 3 ஆண்டுகளாக வசித்து வரும் தமிழ்நாட்டிற்காக இரண்டு முறை தமிழ்நாடு அணியின் சார்பாகக் கலந்துகொண்டு இந்தியாவின் சார்பாக விளையாடியவர்கள் தகுதி பெறுவர்.

2) இந்தியாவின் சார்பாக கலந்து கொண்டு தமிழ்நாட்டில் பணியின் நிமித்தம் குறைந்தது 5 ஆண்டுகளாக வசித்து வரும் முப்படை, இரயில்வே, காவல், அஞ்சல் மற்றும் தொலை தொடர்புத்துறை மற்றும் இதர துறைகளில் பணிபுரிபவர்கள் விண்ணப்பிக்கத் தகுதி பெறுவர்.

3) இரண்டாவது முறையாக ஒரு நபருக்கு இவ்விருது வழங்கப்பட மாட்டாது.

4) ஒருவர் காலமாகும் பட்சத்திலும் இவ்விருது வழங்கப்படும்.

5) விருதிற்கு முந்தைய 3 ஆண்டுகளில் விளையாட்டில் பெற்ற சிறந்த வெற்றிகளை இவ்விருதிற்காகக் கருத்தில் கொள்ளப்படும்.

6) விளையாட்டு வீரர்கள்/வீராங்கனைகள் தங்களது சான்றிதழ்களின் நகல்களை சான்றொப்பத்துடன் இணைத்தல் வேண்டும்.

7) உரிய விண்ணப்பத்தில் விண்ணப்பித்தல் வேண்டும்.

8) இவ்விருதிற்காக பரிந்துரை செய்யப்படுபவர்கள் மேற்காணும் விதிகளை ஏற்றுக்கொள்ள வேண்டும்.

9) விளையாட்டுப் போட்டிகளின் முன்னுரிமை வரிசை பின்வருமாறு:-

· ஒலிம்பிக் போட்டிகள்

· காமன்வெல்த் விளையாட்டுப் போட்டிகள்

· ஆசியப் போட்டிகள்

· சர்வதேச ஒலிம்பிக் குழு அங்கீகாரத்துடன் சர்வதேச விளையாட்டு இணையத்தால் நடத்தப்படும் உலக வாகையர் போட்டிகள் (4 ஆண்டுகளுக்கு ஒருமுறை, 2 ஆண்டுகளுக்கு ஒருமுறை மற்றும் ஆண்டுதோறும்).

· சர்வதேச ஒலிம்பிக் குழு அங்கீகாரத்துடன் சர்வதேச விளையாட்டு இணையத்தால் நடத்தப்படும் காமன்வெல்த் வாகையர் போட்டிகள் (4 ஆண்டுகளுக்கு ஒருமுறை, 2 ஆண்டுகளுக்கு ஒருமுறை மற்றும் ஆண்டுதோறும்).

· தெற்காசிய விளையாட்டுப் போட்டிகள் 

· தேசிய விளையாட்டுப் போட்டிகள் 

· மத்திய இளைஞர் நலன் மற்றும் விளையாட்டுத் துறையினால் அங்கீகரிக்கப்பட்ட தேசிய விளையாட்டு இணையம் நடத்தும் தேசிய வாகையர் பேட்டிகள்

10). அழைப்புப் போட்டிகள் மற்றும் மண்டலங்களுக்கு இடையேயான போட்டிகள் கருத்தில் கொள்ளப்படாது.   முதலமைச்சர் மாநில விளையாட்டு விருதுக்கான விண்ணப்பங்கள், விருது ஆண்டுக்கு முந்தைய மூன்று ஆண்டுகள் தமிழ்நாட்டில் வாழ்ந்து சாதனைகள் படைத்த தலைசிறந்த விளையாட்டு வீரர்கள் பன்னாட்டு அளவில் அங்கீகரிக்கப்பட்ட விளையாட்டுக்களில் பதக்கமும் அதாவது உலகக் கோப்பை, தெற்காசிய விளையாட்டுப் போட்டிகள், அங்கீகரிக்கப்பட்ட சம்பந்தப்பட்ட விளையாட்டு இணையங்களினால் நடத்தப்படும் தேசிய விளையாட்டுப் போட்டிகள் மற்றும் தேசிய சாம்பியன்ஷிப் போட்டிகளில் தனிநபர் போட்டிகளில் முதல் மூன்று இடங்களிலும் மற்றும் குழுப்போட்டிகளில் முதல் மற்றும் இரண்டாம் இடமும் பெற்றிருத்தல் வேண்டும்.  போட்டிகளில் பெற்ற வெற்றிகள் கருத்தில் கொள்ளப்படும்.

11). 2020-21ஆம் ஆண்டுக்கான விருதுக்கு முந்தைய மூன்று ஆண்டுகளான 1.4.2017 முதல் 31.03.2020 முடிய பெற்ற வெற்றிகள் கருத்தில் கொள்ளப்படும்.  தனிநபர் போட்டிகளில் முதல் மூன்று இடங்களிலும் மற்றும் குழுப் போட்டிகளில் முதல் மற்றும் இரண்டாம் இடமும் பெற்றிருத்தல் வேண்டும்.  தொடர்ச்சியாக மூன்று ஆண்டுகளின் சாதனைகள் கருத்தில் கொள்ளப்படும்.

விருதுக்கு விண்ணப்பிக்கும் தலைசிறந்த விளையாட்டு வீரர்கள், தமிழ்நாடு விளையாட்டுக் கழகம்/மாவட்ட விளையாட்டு அலுவலர்/முதன்மைக் கல்வி அலுவலர்/முதன்மை உடற்கல்வி ஆய்வர் (ஆடவர்/மகளிர்) விளையாட்டுப் போட்டிகளை நடத்தும் ஒரு நடத்துநர்/ஒரு நிர்வாகி/ஓர் ஆதரவளிக்கும் நிறுவனம் மற்றும் ஒரு நன்கொடையாளர் (ரூ.10.00 இலட்சத்திற்கும் அதிகமாக நன்கொடை அளித்தவர்)/ஓர் ஆட்ட நடுவர்/நடுவர்/நீதிபதி ஆகியோர்கள் உரிய வழிமுறையாகவும் விண்ணப்பங்கள் உறுப்பினர்-செயலர் அவர்களுக்கு வந்து சேரும்படி அனுப்ப வேண்டும்.

விளையாட்டில் சிறந்து விளங்கும் விளையாட்டு வீரர்/வீராங்கனைகளுக்கு மற்றும் விளையாட்டுப் போட்டிகளை நடத்தும் ஒரு நடத்துநர்/ ஒரு நிர்வாகி/ஓர் ஆதரவளிக்கும் நிறுவனம் மற்றும் ஒரு நன்கொடையாளர் (ரூ.10.00 இலட்சத்திற்கும் அதிகமாக நன்கொடை அளித்தவர்)/ஓர் ஆட்ட நடுவர்/நடுவர்/நீதிபதி ஆகியோர்களக்கான முதலமைச்சர் மாநில விளையாட்டு விருதுக்கான விண்ணப்பப் படிவம் மற்றும் விரிவான விதிமுறைகள் தமிழ்நாடு விளையாட்டு மேம்பாட்டு ஆணைய இணையதளம் மூலம் பெற்றுக் கொள்ளலாம்.  (www.sdat.tn.gov.in)

விண்ணப்பங்கள் அடங்கிய உறையின் மேல் "முதலமைச்சர் மாநில விளையாட்டு விருதுக்கான விண்ணப்பம்-2020-21" என்று எழுதப்பட்டிருக்க வேண்டும்.

பூர்த்தி செய்யப்பட்ட விண்ணப்பங்கள் தமிழ்நாடு விளையாட்டு மேம்பாட்டு ஆணைய தலைமை அலுவலகத்திற்கு நேரடியாக வந்து சேர வேண்டிய கடைசி நாள் 15.07.2021. என மாவட்ட ஆட்சித் தலைவர் திரு.பெ.குமாரவேல் பாண்டியன்.இ.ஆ.ப., அவர்கள் தெரிவித்துள்ளார்.

செய்தி வெளியீடு: செய்தி மக்கள் தொடர்பு அலுவலர், வேலூர்.

அதிகாரப் பூர்வ இணையதளம் காண கீழே உள்ள லிங்க் கிளிக் செய்யவும்

https://www.sdat.tn.gov.in/