ஊட்டி பர்லியாரில் பயங்கர நிலச்சரிவு: அரசுப் பேருந்து ஓட்டுநர் பரிதாப பலி! நிலச்சரிவில் தப்பிய கன்டக்டர் கூறிய திடுக்கிடும் தகவல்கள்!

 ஊட்டி, அக்டோபர் 24:

தமிழகத்தில் வடகிழக்குப் பருவமழை தீவிரமடைந்து வரும் நிலையில், நீலகிரி மாவட்டம் முழுவதும் நேற்றிரவு முதல் இடைவிடாது கொட்டித் தீர்த்த கனமழையால் ஊட்டி - மேட்டுப்பாளையம் மலைப்பாதையில் உள்ள பர்லியார் பகுதியில் பயங்கர நிலச்சரிவு ஏற்பட்டது.

இந்த நிலச்சரிவில் உதகையில் இருந்து மேட்டுப்பாளையம் நோக்கிச் சென்ற தமிழ்நாடு அரசுப் போக்குவரத்துக் கழகப் (TNSTC) பேருந்து சேற்றுக்குள்ளும் இடிபாடுகளுக்குள்ளும் சிக்கியது. இந்த கோர விபத்தில் பேருந்தின் ஓட்டுநர் ஜனகராஜ் இடிபாடுகளில் சிக்கி பரிதாபமாக உயிரிழந்தார். காயங்களுடன் மீட்கப்பட்ட நடத்துநர் கேசவன் மருத்துவமனையில் அனுமதிக்கப்பட்டுச் சிகிச்சை பெற்று வருகிறார்.

✨ 2027 புத்தாண்டு ராசி பலன்கள் – முழுமையான கணிப்பு!

🔮 2027-ல் உங்கள் ராசிக்கு என்ன பலன்?

♈ மேஷம் முதல் மீனம் வரை 12 ராசிகள்

💫 புத்தாண்டில் தொழில், பணவரவு, திருமணம், குடும்பம் மற்றும் வாழ்க்கை முன்னேற்றம் குறித்து உங்கள் ராசிக்கான வருடப் பலன்களைப் படியுங்கள்.

 

"மழை நின்னதும் போகலாம்னு இருந்தோம்..." - கன்டக்டர் கேசவன் வாக்குமூலம்

நிலச்சரிவு இடிபாடுகளிலிருந்து மீட்புப் படையினரால் உயிருடன் மீட்கப்பட்ட பேருந்து நடத்துநர் கேசவன், விபத்து நடந்த நேரத்தில் என்ன நடந்தது என்பது குறித்துக் கண்ணீருடன் விவரித்துள்ளார்:

"நாங்கள் ஊட்டியில் இருந்து மேட்டுப்பாளையத்திற்குப் பேருந்தை ஓட்டி வந்துகொண்டிருந்தோம். பர்லியார் பகுதிக்கு அருகே வரும்போது சாலையில் திடீரென மரம் முறிந்து விழுந்தது. இதனால் அசம்பாவிதம் ஏதும் ஏற்படாமல் இருக்க, எங்கள் பேருந்தில் இருந்த பயணிகளை உடனடியாகப் பின்னால் வந்த மாற்றுப் பேருந்தில் ஏற்றி அனுப்பி வைத்தோம்.

பயணிகளை அனுப்பிய பிறகு நானும் டிரைவர் ஜனகராஜும் மட்டும் பேருந்தில் இருந்தோம். எங்களையும் மாற்றுப் பாதையில் செல்லச் சொன்னார்கள். ஆனால் அந்த நேரத்தில் மழை மிகக் கடுமையாகப் பெய்ததால், மழை சற்று குறைந்தவுடன் பேருந்தை நகர்த்தலாம் என நினைத்துப் பேருந்திற்குள்ளேயே காத்திருந்தோம்.

அப்போது கண்ணிமைக்கும் நேரத்தில் மலையிலிருந்து பயங்கர சத்தத்துடன் நிலச்சரிவு ஏற்பட்டு சேறும் சகதியும் மரங்களும் பேருந்தின் மீது விழுந்தன. மீட்புக் குழுவினர் வந்து என்னை உயிருடன் மீட்டுவிட்டனர். ஆனால் என் உடன் இருந்த ஓட்டுநர் ஜனகராஜ் இடிபாடுகளுக்குள் சிக்கி உயிரிழந்துவிட்டார். எங்களுக்கு அருகில் கோழிகளை ஏற்றி வந்த லாரியும் நிலச்சரிவில் சிக்கியது, ஆனால் அதன் டிரைவர் சமயோசிதமாகக் குதித்துத் தப்பித்துவிட்டார்."

ஒரே நாளில் 25 செ.மீ மழை: ஸ்தம்பித்த நீலகிரி

பர்லியார் பகுதியில் மட்டும் கடந்த 24 மணி நேரத்தில் 25 செ.மீ (250 மி.மீ) அளவுக்கு மிகக் கனமழை பதிவாகியுள்ளது. ஒட்டுமொத்தமாக மாவட்டத்தில் பல்வேறு பகுதிகளில் குறுகிய காலத்தில் பெய்த கொட்டித் தீர்த்த கனமழையால் காட்டாற்று வெள்ளம் பெருக்கெடுத்து ஓடுகிறது.

• கோத்தகிரியில் 200 மி.மீ, எடப்பள்ளியில் 161 மி.மீ என மாவட்டம் முழுவதும் ஒரே நாளில் மிக அதிக அளவிலான மழை பதிவாகியுள்ளது.
• குன்னூர் - மேட்டுப்பாளையம் மலைப்பாதையில் 20-க்கும் மேற்பட்ட இடங்களில் மரங்கள் முறிந்து விழுந்தும், நிலச்சரிவு ஏற்பட்டோ போக்குவரத்து முற்றிலும் துண்டிக்கப்பட்டுள்ளது.
• மலைப்பாதையில் சுமார் 3 கிலோமீட்டர் தூரத்திற்கு வாகனங்கள் நீண்ட வரிசையில் அணிவகுத்து நிற்கின்றன.
• குன்னூர் - மேட்டுப்பாளையம் இடையே இயக்கப்படும் உலகப் புகழ்பெற்ற மலை ரயில் சேவையும் ரத்து செய்யப்பட்டுள்ளது.

சுற்றுலாப் பயணிகளுக்குத் தடை & மாற்றுப் பாதை அறிவிப்பு

கனமழை மற்றும் நிலச்சரிவு அபாயம் தொடர்வதால், ஊட்டி உள்ளிட்ட நீலகிரி மாவட்டப் பகுதிகளுக்குச் சுற்றுலாப் பயணிகள் யாரும் வரவேண்டாம் என மாவட்ட நிர்வாகம் மற்றும் காவல் துறை தீவிர எச்சரிக்கை விடுத்துள்ளது. மேலும், நீலகிரியில் உள்ள அனைத்துச் சுற்றுலாத் தலங்களும் தற்காலிகமாக மூடப்பட்டுள்ளன.

சாலையில் விழுந்துள்ள மண் மற்றும் மரங்களை நெடுஞ்சாலைத் துறையினரும், தீயணைப்புத் துறையினரும் போர்க்கால அடிப்படையில் அகற்றி வருகின்றனர். மேட்டுப்பாளையம் - ஊட்டி செல்லும் வாகனங்கள் கோத்தகிரி - மேட்டுப்பாளையம் மாற்றுப் பாதையைப் பயன்படுத்துமாறு வாகன ஓட்டிகளுக்கு அறிவுறுத்தப்பட்டுள்ளது. 

English Short News

TNSTC Bus Driver Killed in Nilgiris Landslide Near Burliar

Nilgiris, October 24: Heavy downpours triggered a massive landslide near Burliar on the Coonoor-Mettupalayam highway, leaving a Tamil Nadu State Transport Corporation (TNSTC) government bus driver, Janagaraj, dead and conductor Kesavan injured. The passengers had been safely shifted to another bus shortly before the debris and uprooted trees crushed the vehicle. Rescue teams retrieved conductor Kesavan alive from the mud, while driver Janagaraj succumbed to severe injuries. Heavy rainfall exceeding 25 cm in 24 hours has blocked major hill routes, prompting district authorities to issue a holiday for schools and advise tourists against visiting the Nilgiris.