"தமிழகத் தேர்தலில் பாசிச சக்திகளைப் புறக்கணிப்போம்": தமிழ்நாடு தவ்ஹீத் ஜமாஅத் மாவட்டச் செயற்குழுவில் அதிரடித் தீர்மானம்!

மாநில செயலாளர் முஹம்மது ஒலி

 காஞ்சிபுரம் | ஏப்ரல் 05, 2026

தமிழ்நாடு தவ்ஹீத் ஜமாஅத் (TNTJ) காஞ்சிபுரம் மாவட்டச் செயற்குழு கூட்டம், நேற்று சனி்க்கிழமை காலை 8 மணியளவில் நடுவீரப்பட்டு தவ்ஹீத் பள்ளிவாசலில் நடைபெற்றது. மாநிலச் செயலாளர் முஹம்மது ஒலி MISC தலைமையில் நடைபெற்ற இக்கூட்டத்தில் 200-க்கும் மேற்பட்ட நிர்வாகிகள் மற்றும் தொண்டர்கள் கலந்துகொண்டனர்.

முக்கியத் தீர்மானங்கள் மற்றும் கோரிக்கைகள்:

• பாசிச சக்திகளுக்குப் புறக்கணிப்பு: வரும் தமிழகச் சட்டமன்றத் தேர்தலில் பாசிச சக்திகளை முற்றிலுமாகப் புறக்கணிப்பது எனச் செயற்குழுவில் ஒருமனதாகத் தீர்மானம் நிறைவேற்றப்பட்டது.

• இடஒதுக்கீடு உயர்வு: கல்வி மற்றும் வேலைவாய்ப்புகளில் முஸ்லிம்களுக்கான இடஒதுக்கீட்டை 7% ஆக உயர்த்தி வழங்க வேண்டும் என வலியுறுத்தப்பட்டது.

• தேர்தல் ஆணையம் மீது விமர்சனம்: "கேரள அரசியல் கட்சிகளுக்கு அனுப்பப்பட்ட கடிதத்தில் தேர்தல் ஆணைய முத்திரைக்குப் பதில் பாஜக-வின் தாமரைச் சின்னம் இருந்தது கண்டிக்கத்தக்கது. தேர்தல் ஆணையம் நடுநிலையுடன் செயல்பட வேண்டும்; இல்லையெனில் ஜனநாயகப் போராட்டங்களைச் சந்திக்க நேரிடும்," என எச்சரிக்கப்பட்டது.

"அண்ணல் நபியே அழகிய முன்மாதிரி" - 10 மாதச் செயல்திட்டம்:

செயற்குழுவிற்குப் பின் செய்தியாளர்களிடம் பேசிய மாநிலச் செயலாளர் முஹம்மது ஒலி, "அண்ணல் நபியே அழகிய முன்மாதிரி" என்ற 10 மாதகாலச் செயல்திட்டம் தொடங்கப்பட்டுள்ளதாக அறிவித்தார். இதன் கீழ்:

• நபிகளாரின் ஆட்சி முறை மற்றும் பெண்ணுரிமை.

• இறைத்தூதர் வழியில் இளைஞர்கள்.

• சமூகத் தீமைகளுக்குத் தீர்வு கண்ட நபிகள் நாயகம். போன்ற நபிகளாரின் பொன்மொழிகளையும், வாழ்வியலையும் அனைத்துக் கிளைகள் மூலமாக மக்களிடம் கொண்டு சேர்க்கும் பணிகள் துவங்கப்பட்டுள்ளன.

மாவட்ட தலைவர் அக்ரம்

பங்கேற்ற நிர்வாகிகள்:

இந்நிகழ்வில் மாவட்டத் தலைவர் அக்ரம், செயலாளர் அஷ்ரப் அலி, பொருளாளர் அப்துல் காதர் மற்றும் மாவட்ட, கிளை நிர்வாகிகள் முன்னிலை வகித்தனர். மாவட்டத் தலைவர் அக்ரம் சிறப்புரையாற்றினார்.