காஞ்சிபுரத்தில் 70 அடி உயர பிரம்மாண்ட தேர்: 10 ஆயிரம் கிலோ சவுக்கு கம்புகளால் பணிகள் தீவிரம் – மார்ச் 28-ல் தேரோட்டம்!

 காஞ்சிபுரம் | மார்ச் 23, 2026

காஞ்சிபுரம் இளவார் குழலி சமேத ஏகாம்பரநாதர் திருக்கோயில் பங்குனி உத்திரத் திருவிழா கடந்த 22-ஆம் தேதி தொடங்கி நடைபெற்று வருகிறது. விழாவின் முக்கிய நிகழ்வான 'மகா ரதம்' எனப்படும் தேர்த்திருவிழா வரும் மார்ச் 28-ஆம் தேதி (சனிக்கிழமை) நடைபெறவுள்ளது. இதற்கான கட்டுமானப் பணிகள் இன்று (திங்கட்கிழமை) பந்தல்கால் நடும் நிகழ்வுடன் அதிகாரப்பூர்வமாகத் தொடங்கின.

பிரம்மாண்ட தேரின் சிறப்பம்சங்கள்:

• கட்டுமானம்: இலுப்பை மரத்தால் ஆன தேரின் பீடத்தின் மீது, சுமார் 10,000 கிலோ எடையுள்ள சவுக்குக் கம்புகளைக் கொண்டு தேரின் மேலடுக்குக் கட்டமைக்கப்படுகிறது.

• உயரம்: அலங்கரிக்கப்பட்ட பிறகு இந்தத் தேர் சுமார் 70 அடி உயரத்தில் பிரம்மாண்டமாகத் தோட்சியளிக்கும்.

• கால்கோள் விழா: தேரின் பீடத்தில் பந்தல்கால் நடும் விழாவையொட்டி, சவுக்குக் கம்புகளுக்குச் சிறப்பு அபிஷேகங்கள் மற்றும் தீபாராதனைகள் காட்டப்பட்டுப் பொருத்தும் பணி தொடங்கியது.

திருவேகம்பன் சிவாலய அறக்கட்டளை ஏற்பாடுகள்:

தேரோட்டத் திருவிழாவிற்கான விரிவான ஏற்பாடுகளைச் செய்து வரும் அறக்கட்டளையின் தலைவர் ப. பன்னீர் செல்வம் கூறியுள்ளதாவது: "காஞ்சிபுரத்தின் ராஜவீதிகளில் இந்தத் தேர் பவனி வருவதற்கான அனைத்துப் பணிகளும் முழுவீச்சில் நடக்கின்றன. விழாவையொட்டி 1,000-க்கும் மேற்பட்ட பெண்கள் வீதிகளில் கோலமிட்டுத் தேரை வரவேற்க உள்ளனர். சிவ வாத்தியங்கள், பரதநாட்டியம் மற்றும் நாள் முழுவதும் அன்னதானம் எனப் பல்வேறு கலை நிகழ்ச்சிகளுக்குத் திட்டமிடப்பட்டுள்ளது."

பங்கேற்கும் முக்கியப் பிரமுகர்கள்:

இந்தத் தேரோட்ட நிகழ்வில்:

• ஈரோடு கோபி திருஞானசம்பந்தர் திருமடத்தின் ஆதீனம் சிவாக்கர தேசிக சுவாமிகள்.

• ஓய்வு பெற்ற உயர்நீதிமன்ற நீதிபதி என். கிருபாகரன்.

• காஞ்சிபுரம் மாவட்ட ஆட்சியர் தி. சினேகா, எஸ்பி கே. சண்முகம்.

• கோயில் அறங்காவலர் குழுத் தலைவர் எம்.வி.எம். வேல்மோகன் மற்றும் அறநிலையத்துறை அதிகாரிகள் பங்கேற்க உள்ளனர்.

இன்று நடைபெற்ற கால்கோள் விழாவில் அறக்கட்டளை நிர்வாகிகள் ராஜேந்திரன், பத்மனாபன், குமார், நந்தகுமார் ஸ்தபதி உள்ளிட்டோர் கலந்துகொண்டனர். 2 ஆண்டுகளுக்குப் பிறகு நடைபெறும் தேரோட்டம் என்பதால் காஞ்சிபுரம் மக்கள் மிகுந்த எதிர்பார்ப்பில் உள்ளனர்.