3 நாட்களுக்கு பொள்ளாச்சி மாரியம்மன் கோயில் தேரோட்டம் - வெள்ளித்தேர் தயார் செய்யும் பணி மும்மரம்..

கோவை :

பொள்ளாச்சி கடை வீதியில் பிரசித்தி பெற்ற மாரியம்மன் கோவில் உள்ளது. இந்த கோவிலில் ஆண்டுதோறும் மாசி மாதம் வெள்ளி தேர்த்திருவிழா கொண்டாடப்படும். 

இந்த ஆண்டிற்கான திருவிழா கடந்த 15ம் தேதி நோன்பு சாட்டுதலுடன் தொடங்கியது. இதைத்தொடர்ந்து 22ம் தேதி இரவு 10 மணிக்கு கோவில் முன் கம்பம் நடப்பட்டது. 

பின்னர் பெண்கள் வீடுகளில் இருந்து மஞ்சள் நீர் கொண்டு கம்பத்திற்கு ஊற்றி வழிபட்டு வருகின்றனர். திருவிழா முடியும் வரை இந்த கம்பத்திற்கு பெண்கள் மஞ்சள் நீர் ஊற்றி வழிபடுவார்கள். கடந்த 1ம் தேதி கம்பத்தில் கோவில் பூவோடு வைக்கப்பட்டது. மேலும் கோவில் கொட்டு கட்டுதல் நிகழ்ச்சி நடைபெற்றது.

இதை தொடர்ந்து விரதம் இருந்த பக்தர்கள் பல்வேறு பகுதியில் இருந்து பூவோடு ஏந்தி கோவிலுக்கு வரும் நிகழ்ச்சி நடந்து வருகிறது. 

திங்கட்கிழமை காலை 9 மணிக்கு ஆயக்கால் போடுதல்,  செவ்வாய்க்கிழமை  காலை 9 மணிக்கு மேல் மகுடம் வைத்தல், புதன்கிழமை காலை 6 மணிக்கு மாவிளக்கு எடுத்து வருதல், அதை தொடர்ந்து 10 மணிக்கு திருக்கல்யாண உற்சவம் நடை பெறுகிறது. 

முக்கிய நிகழ்ச்சியான முதல் நாள் வெள்ளித் தேர் இரவு 7 மணிக்கு புறப்பட்டு, வெங்கட்ரமணன் வீதியில் இமான்கான் வீதி சந்திப்பில் நிறுத்தப்படுகிறது.

வியாழக்கிழமை இரவு 7 மணிக்கு வெங்கட்ரமணன் வீதியில் இருந்து 2ம் நாள் தேர் புறப்பட்டு, சத்திரம் வீதியில் கொண்டு நிறுத்தப்படுகிறது. 

வருகிற 7ம் தேதி இரவு 7 மணிக்கு அங்கிருந்து 3ம் நாள் தேர் புறப்பட்டு, தேர் நிலைக்கு வருதல், அதை தொடர்ந்து பரிவேட்டை, தெப்பத்தேர் உற்சவம் ஆகிய நிகழ்ச்சிகள் நடைபெறுகிறது. 

8ம் தேதி காலை 8.30 மணிக்கு அம்மன் மஞ்சள் நீராடுதல், இரவு 9 மணிக்கு கம்பம் எடுத்தல் நிகழ்ச்சி நடக்கிறது. பின்னர் 10ம் தேதி இரவு 8 மணிக்கு மகா அபிஷேகம் நடைபெறுகிறது. 

தேர்த்திரு விழாவை யொட்டி வெள்ளித்தேர் மற்றும் விநாயகர் தேரை தயார் செய்யும் பணியில் ஊழியர்கள் ஈடுபட்டு உள்ளனர்.